Iloilo City – Umabot sa Php476,000 halaga ng shabu ang nasabat sa isinagawang buy-bust operation ng Iloilo City PNP sa Zone 1, Barangay Desamparados, Jaro, Iloilo City nitong Sabado, Marso 25, 2023.
Kinilala ni Police Captain Val Cambel, Team Leader ng City Drug Enforcement Unit ng ICPO, ang subject person na si Jopet Gaje “aka Toto”, 37, tricycle driver, isang High Value Individual, at residente ng Brgy. Oñate De Leon, Mandurriao.
Ang naturang operasyon ay isinagawa ng mga operatiba ng City Drug Enforcement Unit ng ICPO kasama ang Station Drug Enforcement Team ng Police Station 3 at ng Special Weapons and Tactics (SWAT Team) ng ICPO.
Ayon kay Police Captain Cambel, halos dalawang linggo nilang minamanmanan ang naturang suspek hanggang sa makatanggap sila ng mga impormasyon sa mga residente ng naturang lugar ukol sa pagbebenta ng ilegal droga ni Gaje.
Sa pagkakaaresto ni Gaje ay narekober sa kanya ang 70 gramo ng pinaghihinalaang shabu na may estimate market value na Php476,000, kabilang din sa narekober ang isang weighing scale at isang plastic canister.
Ang suspek ay nahaharap sa kasong paglabag sa R.A. 9165 o Comprehensive Dangerous Drugs Act of 2002.
Siniguro ng buong hanay ng Iloilo City PNP ang maayos at epektibong pagsasakatuparan ng kampanya kontra ilegal na droga na kanilang ipagpapatuloy para sa maayos at mapayapang pamayanan.
