Nasabat ng mga awtoridad mula sa dalawang indibidwal ang tinatayang Php400,000 halaga ng shabu sa isinagawang buy-bust operation sa Barangay San isidro, General Santos City nito lamang Pebrero 21, 2024.
Kinilala ni Police Brigadier General Jimili L Macaraeg, Regional Director ng Police Regional Office 12, ang mga suspek na sina alyas “Tho”, lalaki, 43 anyos, may asawa at alyas “Aimelyn”, babae, 41, na kapwa residente ng Barangay Poblacion Datu Piang, Kabacan, North Cotabato.
Ayon kay PBGen Macaraeg, dakong alas 11:23 ng gabi nang nahuli ang mga suspek sa isinagawang buy-bust operation ng General Santos City Police Station kasama ang Police Drug Enforcement Group, Police Station 4 General Santos City Police Office at Philippine Drug Enforcement Agency 12.
Narekober mula sa mga suspek ang apat na pakete na naglalaman ng hinihinalang shabu na may kabuuang bigat na humigit kumulang 62.7 gramo na tinatayang may Standard Drug Price na Php426,360; Php138,000 na ginamit bilang buy-bust money; at iba pang non-drug items.
Mahaharap ang mga suspek sa kasong paglabag sa Section 5 at 11 sa ilalim ng Article II ng Republic Act 9165 o Comprehensive Dangerous Drugs Act of 2002.
Ang sunod sunod na operasyon kontra ilegal na droga ay bunga ng pinaigting na kampanya kontra ilegal na droga ng Pambansang Pulisya bilang suporta sa programang “Bagong Pilipinas” ng kasalukuyang administrasyon tungo sa ligtas, maayos, at mapayapang bansa.
Panulat ni Patrolwoman Emelou F Pedroso
