Cebu City – Nakuha ang tinatayang Php4.5 milyong halaga ng shabu sa isang tulak ng droga sa ikinasang buy-bust operation ng Cebu City PNP nito lamang Miyerkules, ika-05 ng Oktubre 2022.
Kinilala ni Police Colonel Ireneo B Dalogdog, City Director ng Cebu City Police Office, ang suspek na si Elton John Paraiso Dela Torre a.k.a “AKI”, 30, residente ng Purok Tamprut, Poblacion Compostela, Cebu at kabilang sa High Value Individual (HVI) sa Regional Level.
Ayon kay PCol Dalogdog, naaresto ang suspek bandang 6:00 ng gabi sa isang Chinese Cemetery, Brgy. Carreta, Cebu City ng mga operatiba ng City Drug Enforcement Unit, Cebu City Police Office (CCPO) sa pangunguna ni Police Lieutenant Colonel Dindo Juanito B Alaras.
Ayon pa kay PCol Dalogdog, nakumpiska ang nasa 675 gramo ng hinihinalang shabu na may Standard Drug Price na Php4,590,000, mga bag na ginamit bilang lalagyan ng droga at buy-bust money.
Nahaharap ang suspek sa kasong paglabag sa Section 5 at 11, Article II ng RA 9165 o ang Comprehensive Dangerous Drugs Act of 2002.
Patuloy na sisikapin ng Cebu City Police Office na mas papaigtingin pa ang kampanya laban sa ilegal na droga para mahuli ang mga nagtutulak at gumagamit ng ipinagbabawal na gamot at makamit ang mas ligtas, maayos at tahimik na pamayanan.
