Kalinga – Tinatayang Php4,480,000 halaga ng marijuana ang binunot at sinunog sa tatlong araw na marijuana eradication sa Brgy. Butbut Proper, Tinglayan, Kalinga nito lamang Marso 22-24, 2023.
Ayon kay Police Colonel Charles Dommalig, Provincial Director ng Kalinga Police Provincial Office, naging matagumpay ang operasyon sa pinagsanib na pwersa ng Tinglayan Municipal Police Station, 2nd Kalinga Provincial Mobile Force Company, Philippine Drug Enforcement Agency-Kalinga at Kalinga Regional Intelligence Unit 14.
Nadiskubre ng mga operatiba sa unang plantation site ang higit kumulang 4,000 na piraso ng Fully Grown Marijuana Plants (FGMP) na may Standard Drug Price (SDP) na Php800,000 sa lupain na may kabuuang sukat na 400 square meters, habang sa ikalawang plantation site ay nadiskubre ang higit kumulang 6,400 piraso ng FGMP sa lupain na may sukat na 800sqm at may SDP na Php1,280,000.
Dagdag pa dito, nadiskubre rin ng mga operatiba ang mga pinatuyong dahon ng Marijuana at fruiting tops in bricks form na may timbang na humigit kumulang 20,000 gramo na may SDP na Php2,400,000.
Kaagad namang binunot at sinunog ang mga nadiskubreng marijuana at walang naitalang marijuana cultivator.
Ang Kalinga PNP ay patuloy na makikipag-ugnayan sa komunidad para mahuli ang mga nagtanim ng ipinagbabawal na halaman at mas papaigtingin ang kampanya laban sa ilegal na halaman sa kanilang nasasakupan.
Source: Tinglayan Municipal Police Station
