Bacolod City – Arestado ang isang drug suspek na miyembro ng isang kilalang Drug Group sa isinagawang drug buy-bust operation sa Bacolod City, kung saan tinatayang Php4,352,000 na halaga ng pinaniniwalang shabu ang nalambat ng Bacolod City PNP sa Purok Pilipinhon, Barangay 30, Bacolod City, nitong Nobyembre 23, 2023.
Kinilala ni Police Colonel Noel Aliño, City Director ng Bacolod City Police Office, ang subject person na si alyas “Mar-mar”, miyembro ng Caunda Drug Group.
Ang operasyon ay inilunsad pasado ala-1 ng umaga ng pinagsanib na mga operatiba ng Bacolod City Police Office-City Drug Enforcement Unit at City Intelligence Unit.
Sa naturang operasyon, nakumpiska sa suspek ang walong (8) pakete na naglalaman ng pinaghihinalaang shabu at walong (8) plastic bag na naglalaman din pinaghihinalaang shabu, na nagtitimbang ng tinatayang 640 gramo.
Kabilang din sa mga narekober sa operasyon ang ginamit na buy-bust money, at isang sling bag.
Nahaharap ngayon ang suspek sa kasong paglabag sa RA 9165 o ang Comprehensive Dangerous Drugs Act of 2002.
Patunay lamang ang tagumpay ng nasabing operasyon sa mas pinaigting na kampanya ng PRO 6 kontra ilegal na droga tungo sa hangaring maging drug-free ang buong rehiyon ng Western Visayas.
