Makati City – Umabot sa Php4.2 milyong halaga ng shabu ang nakumpiska sa buy-bust ng Makati City Police Station nito lamang Biyernes, Hulyo 22, 2022.
Kinilala ni SPD Director, PBGen Jimili Macaraeg ang mga suspek na sina Jebert Baluarte y Antonio alyas “Kanor”, Filipino, driver, 26; Leopoldo Montes y Jamon alyas “Leo”, driver, 53; Myrafe Montes y Jamero alyas “Fe”, 42; Paul Graham Gonzalez alyas “Paul”, 28; at Reinsher Anne Jamero alyas “Ann”, online seller, 23.
Ayon kay PBGen Macaraeg, naaresto ang mga suspek bandang alas-8:25 ng gabi sa Amarillo St. Barangay Rizal, Makati City ng mga operatiba ng Station Drug Enforcement Unit ng Makati CPS.
Nakumpiska sa kanila ang limang buhol ng transparent plastic sachet na naglalaman ng hinihinalang shabu na may bigat na 625 gramo at may Standard Drug Price na Php4,250,000, isang genuine Php1000 na buy-bust money, 99 piraso Php1000 na ginamit bilang boodle money, isang black Nike belt bag, at isang black pouch.
Mahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002.
Pinuri naman ni PBGen Macaraeg ang Makati City Police sa pamumuno ni Police Colonel Harold P Depositar sa kanilang matagumpay na anti-illegal drugs operation, aniya, “Binabati ko ang Makati City Police sa kanilang matagumpay na operasyon kontra ilegal na droga, patunay na ang inyong dedikasyon sa sinumpaang tungkulin at kagustuhang bigyan ang ating mga kabataan ng kinabukasang malayo sa mapanirang dulot ng ilegal na droga ay kahanga-hanga.”
Source: SPD PIO
###
Panulat ni PSSg Remelin M Gargantos
