Bacolod City – Tinatayang nasa Php3 milyong halaga ng shabu ang nakumpiska ng PNP sa magkakahiwalay na drug buy-bust sa Bacolod City nitong Abril 30 at Mayo 1, 2022.
Ayon kay Police Colonel Joseph Thomas Martir, City Director ng Bacolod City Police Office, nitong Linggo, Mayo 1, 2022 ay nahuli ang suspek na si Christian Oliveros alyas Nonoy sa operasyon ng City Drug Enforcement Unit sa Purok Lampirong, Barangay 2 ng nasabing lungsod.
Nakuha mula kay Oliveros ang nasa Php1,700,000 halaga ng shabu, Php1,000.00 marked money at cash na Php300.
Samantala, nakaraang Sabado, Abril 30, 2022 ay naunang nahuli ang tatlong tulak ng droga sa Purok Kahirup, Brgy. Singcang-Airport ng parehong lungsod at nakuha mula sa kanila ang 200 grams ng pinaghihinalaang shabu na may Standard Drug Price na Php1,360,000.
Kinilala naman ni PCol Martir ang mga suspek na sina Baby Girl Villarna, 33, residente ng Brgy. Banago, Bacolod City; Elmar Gallego, 33, at Edmar Infante, 26, parehong residente ng Silay City, Negros Occidental.
Nahulihan rin ng pulisya si Infante (isa sa tatlong mga suspek) ng isang 22 caliber revolver na may tatlong live ammunition.
Samantala, patuloy pa rin ang PNP sa pagpapatupad sa malawakang kampanya laban sa mga ipinagbabawal na droga maging sa pagsugpo ng kriminalidad sa bawat rehiyon sa bansa.
###
