General Santos City – Arestado ang dalawang High Value Individual (HVI) at nasamsam ang tinatayang Php374,000 halaga ng hinihinalang shabu sa ikinasang buy-bust operation ng mga awtoridad bandang 12:53 ng tanghali nito lamang Agosto 22, 2023.
Kinilala ni Police Brigadier General Jimili Macaraeg, Regional Director ng Police Regional Office 12, ang dalawang suspek na sina alyas “Tanggol”, 27, MILF member, residente ng Brgy. R87, Cotabato City; at alyas “Sampaw”, 23, na residente naman ng Talitay Maguindanao Province.
Inaresto ang dalawang suspek sa Brgy. Tambler, General Santos City ng mga tauhan ng Regional Police Drug Enforcement Unit 12 katuwang ang mga operatiba ng GenSan Police Station 5, Regional Intelligence Division 12, Regional Intelligence Unit 12, Regional Special Operations Group 12, PDEG-SOU12, City Mobile Force Company at sa pakikipag-ugnayan sa Philippine Drugs Enforcement Agency (PDEA) 12.
Umabot sa humigit-kumulang 55 gramo ng hinihinalang shabu na nagkakahalaga ng Php374,000 ang nasabat mula sa mga suspek at nakatakdang sampahan ng kasong paglabag sa R.A. 9165 o Comprehensive Dangerous Drugs Act of 2002.
Tinitiyak naman ni PBGen Macaraeg na magpapatuloy ang kanilang mas pinaigting na kampanya upang masugpo ang ilegal na droga sa buong Rehiyong Dose para sa mas ligtas at maayos na pamayanan.
Panulat ni Patrolman Khnerwin Jay A Medelin
