Nasabat ng pulisya ang tinatayang Php374,000 sa naarestong menor-de-edad na lalaki habang nakatakas ang pangunahing suspek sa drug buy-bust operation ng Regional Police Drug Enforcement Unit 6 (RDEU 6) sa Zone 15, Barangay Calaparan, Arevalo, Iloilo City nito lamang ika-24 ng Hulyo 2024.
Kinilala ang pangunahing suspek na si alyas “Migz”, 22 anyos, at alyas “Boknoy”, 17 anyos, menor-de-edad at residente ng Barangay Calaparan, Arevalo, Iloilo City.
Nakatakas sa isinagawang operasyon si alyas “Migz” na tumalon at bumagsak sa bubong ng kabilang bahay patungo sa ilog na pinaniniwalaan ng mga operatiba na ito ay nagtamo ng sugat.
Samantala, inamin ng menor-de-edad na gumagamit siya ng ilegal na droga at nagserbisyo siya bilang katulong ng suspek at ito ay gumagamit simula noong siya ay 15 anyos pa lamang.
Narekober ang 30 plastic sachets ng pinaghihinalaang shabu na may Standard Drug Price na tinatayang Php374,000, 3 digital weighing scale, cellphone, karton, at cash box kung saan nakalagay ang mga pinaghihinalaang ilegal na droga, lighter, Php1,100 at Php12,000 na buy-bust money.
Mahaharap ang suspek sa kasong paglabag sa Republic Act 9165 o Comprehensive Dangerous Drugs Act of 2002.
Patuloy ang kampanya ng Iloilo City PNP at RPDEU 6 upang masugpo ang pagbebenta ng ilegal na droga para sa isang tahimik at ligtas na komunidad.
Source: XFM Radyo Patrol Iloilo
Panulat ni Pat Ryza Valencia
