Angeles City – Arestado ang isang High Value Individual (HVI) at tinatayang Php374,000 halaga ng ilegal na droga ang nakumpiska sa ikinasang buy-bust operation ng Angeles City PNP sa General Malvar Street, Sta. Trinidad, Angeles City nito lamang Miyerkules, ika-04 ng Oktubre 2023.
kinilala ni Police Colonel Amado Mendoza Jr, City Director ng Angeles City Police Office, ang isang drug personality na si alyas “Daddy”, 24, residente ng San Narcison Street Sto. Domingo, Angeles City at tinaguriang isang High Value Individual.
Ayon sa ulat ng Angeles City PNP, nabulaga ang suspek bandang 2:20 ng hapon sa kanilang ikinasang buy-bust operation na nagresulta ng pagkakasabat sa hinihinalang shabu na nagkakahalaga ng Php374,000 na may timbang na 55 na gramo at non-drug items.
Nahaharap sa kasong paglabag sa RA 9165 o Comprehensive Dangerous Drugs Act of 2002 ang kalabosong suspek.
Pakiusap ng Angeles City PNP na itigil ng mga pilit na gumagamit at nagbebenta ng ilegal na droga sa kanilang nasasakupan na kung saan kanilang pananagutin sa ipinapatupad na batas ang mga lalabag dito.
Source: Angeles City Police Office
Panulat ni PCpl Jeselle V Rivera
