Nakumpiska ng Cebu City PNP ang Php374,000 halaga ng hinihinalang shabu mula sa isang High Value Individual sa isinagawang buy-bust operation ng mga otoridad sa Sitio Sta. Ana, Barangay Labangon, Cebu City, noong ika-17 ng Marso 2025.
Ayon kay Police Major Timothy Jim M Romanillos, Acting Station Commander ng Police Station 10 ng Cebu City Police Office, bandang 12:05 ng hating gabi ng ikinasa ng mga operatiba ang naturang buy-bust operation na nagresulta sa pagkaaresto ng HVI na suspek na si alyas “Pongkol”, 41-anyos, at residente ng nabanggit na lugar.
Nasabat mula kay “Pongkol” ang 11 plastic sachets ng hinihinalang shabu na may timbang na 55 gramo at may Standard Drug Price na Php374,000, buy-bust money, at coin purse.
Mahaharap ang suspek sa kasong paglabag sa Republic Act 9165 o “Comprehensive Dangerous Drugs Act of 2002”.
Ang kapulisan ng Cebu City ay patuloy sa pagpapaigting ng kanilang kampanya kontra iligal na droga. Ito ay alinsunod sa pangunahing prayoridad ng pamahalaan na labanan ang mga sindikato ng droga sa pamamagitan ng pagpigil sa kanilang mga iligal na aktibidad at pagbuwag sa kanilang mga operasyon.
Source: CCPO SR
