Tinatayang Php374,000 na halaga ng shabu ang nakumpiska sa isinagawang buy-bust operation ng Bacolod City Police Office, Police Station 8 sa Purok Greenfield, Barangay Tangub, Bacolod City, noong ika- 27 ng Abril 2023.
Kinilala ni Police Captain Glenn Montaño, Station Commander ng PS8 ng BCPO, ang mga naarestong sina Jade Babaran, 48, High Value Individual, kanyang anak na si Janelle Clyde Babaran, 27, Street Level Individual (SLI) parehong residente ng nabanggit na lugar at ang isang 14-anyos na babae.
Ikinasa ang nasabing operasyon pasado alas-1:32 ng madaling araw, Huwebes sa nabanggit na petsa at lugar na nagresulta sa pagkaka-aresto ng tatlong indibidwal kabilang ang isang menor de edad na babae.
Ayon kay PCapt. Montaño, nahuli ang mga drug suspek sa aktong pagbebenta ng isang pakete ng pinaniniwalang shabu sa isang poseur buyer sa halagang Php500.00.
Narekober din sa kanila ang 4 sachets ng suspected shabu na may tinatayang timbang na 55 gramo na nagkalahalaga ng Php374,000, at Php500 na ginamit bilang buy-bust money.
Ayon pa kay PCapt Montaño, nasa himpilan na ng Police Station 8 ang mag-amang suspek upang dumaan sa tamang dokumentasyon at mahaharap sa kasong paglabag sa R.A. 9165 o ang Comprehensive Dangerous Drugs Act of 2002, habang ang menor de edad na babae ay naiturn-over na sa Social Development Center para sa tamang pangangalaga.
Ang Bacolod City PNP ay patuloy sa pagpapatupad ng pinaigting na kampanya kontra ilegal na droga at hindi titigil upang ito ay mapuksa maging sa lahat uri ng kriminalidad sa syudad.
