Sultan Kudarat – Tinatayang Php374,000 halaga ng ilegal na droga ang nakumpiska sa paghahain ng joint Search Warrant ng PNP sa Purok Golden, Brgy. Griño, Tacurong City, Sultan Kudarat nito lamang Setyembre 28, 2022.
Kinilala ni Police Brigadier General Jimili L Macaraeg, Regional Director ng Police Regional Office 12, ang naarestong suspek na tinaguriang High Value Individual (HVI) na si Dionel Toledo y Millezar alyas “Bartuloy”, 42, may asawa, barbero, at residente ng Purok Golden, Barangay Griño, Tacurong City.
Ayon kay PBGen Macaraeg, isinagawa ang Search Warrant bandang 7:00 ng umaga ng pinagsanib puwersa ng mga operatiba ng Sultan Kudarat Provincial Drug Enforcement Unit, Sultan Kudarat Provincial Intelligence Unit, Tacurong City Police Station, 1st Sultan Kudarat Provincial Mobile Force Company – SKPMFC PRO 12 at 1202nd Regional Mobile Force Battalion – PRO 12.
Nakuha mula sa suspek ang 15 na pakete ng hinihinalang shabu na may kabuuang timbang na 55 gramo at tinatayang may street market value na Php374,000.
Samantala, sinaksihan naman ng pamilya ng suspek, opisyales ng naturang barangay at Media Representative ang paghahain ng Search Warrant ng ating kapulisan.
Makikitang nagbubunga ang araw-araw na pagsisikap ng kapulisan ng Police Regional Office 12 para labanan ang ilegal na droga tungo sa kaligtasan at kaayusan ng rehiyong SOCCSKSARGEN dahil sa patuloy na pagkakahuli sa mga sangkot sa ilegal na droga.
Gayunpaman, patuloy na papaigtingin ng Pambansang Pulisya ang kampanya kontra sa ilegal na droga sa buong bansa para sa mas malawakang pagpuksa sa mga drug syndicates.
Source: Tacurong City Police Station
Panulat ni Patrolman Khnerwin Jay A Medelin
