Nasamsam ang mahigit Php372,000 halaga ng shabu mula sa isang High Value Individual sa isinagawang buy-bust operation ng mga operatiba ng Taguig City Police Station nito lamang Huwebes, Abril 3, 2025 dakong 10:10 ng gabi sa kahabaan ng General Luna Street, Barangay Ususan, Taguig City.
Kinilala ni Police Colonel Joey T. Goforth, Chief of Police ng Taguig City Police Station, ang suspek na si alyas “Toryo,” 40 anyos, walang trabaho, at residente ng Mariano Street, Barangay Ususan, Taguig City.
Sa operasyon na isinagawa ng Station Drug Enforcement Unit ng Taguig City Police Station, nasabat mula sa suspek ang tinatayang 54.76 gramo ng hinihinalang shabu na may Standard Drug Price (SDP) na Php372,368.
Kabilang sa mga nakumpiska mula sa suspek ang limang heat-sealed transparent plastic sachets at isang knot-tied plastic sachet na naglalaman ng hinihinalang shabu, isang tunay na Php1,000 bill na ginamit bilang buy-bust money, apat na piraso ng Php1,000 boodle money, at isang coin purse.
Inihahanda ang kasong paglabag sa Sections 5 at 11, Article II ng Republic Act 9165 o ang “Comprehensive Dangerous Drugs Act of 2002” laban sa suspek.
Pinasalamatan ni Police Brigadier General Manuel J. Abrugena, District Director ng Southern Police District, ang mga operatiba sa matagumpay na operasyon at sa patuloy na pagsuporta sa kampanya kontra iligal na droga.
“Ang pagkakaarestong ito ay isang malakas na mensahe sa mga patuloy na nasasangkot sa ilegal na droga — hindi natin palalagpasin ang kanilang mga gawain. Magpapatuloy tayo sa mga agresibo at walang humpay na operasyon upang buwagin ang mga drug networks at papanagutin ang mga nasa likod nito. Naninindigan tayo sa ating layuning panatilihing ligtas ang ating mga komunidad mula sa banta ng ilegal na droga. Hinihikayat din natin ang publiko na manatiling mapagmatyag at makiisa sa ating laban kontra droga”.
Source: SPD PIO
Panulat ni PMSg Remelin Gargantos
