Pasay City — Nakumpiska ang tinatayang Php360,400 halaga ng hinihinalang shabu kasama ng baril at bala sa isang lalaki matapos magsagawa ng buy-bust operation ang Pasay City Police Station nito lamang Miyerkules, Abril 12, 2023.
Kinilala ni PBGen Kirby John Kraft, District Director ng Southern Police District, ang suspek na si alyas “Jan,” 30 taong gulang.
Ayon kay PBGen Kraft, nangyari ang nasabing operasyon bandang alas-7:20 ng gabi sa kahabaan ng Humilidad St., Brgy 14, Zone 1, Pasay City na nagresulta sa pagkakaaresto kay alyas “Jan” ng mga operatiba ng Station Drug Enforcement Unit ng Pasay CPS.
Nasamsam sa kanya ang tatlong medium heat-sealed transparent plastic sachet na naglalaman ng pinaniniwalaang shabu na humigit kumulang 53 gramo at may Standard Drug Price na Php360,400, isang pakete ng medium ziplock transparent plastic sachet ng isang itim na cellular phone, itim na holster, siyam na 9mm na live ammunition, isang Taurus 9mm model G3, isang magazine at buy-bust money na binubuo ng isang tunay na Php1,000 kalakip ang 49 piraso na Php1,000 na boodle money.
Ang suspek ay kabilang sa drug watchlist ng PNP kung saan mahaharap siya sa paglabag sa RA 9165 o Comprehensive Dangerous Drugs Act of 2002 at RA 10591 o Comprehensive Firearms and Ammunition Regulations Act.
Patuloy ang kapulisan ng Southern Metro sa pagtupad ng kanilang sinumpaang tungkulin sa pagpuksa ng mapanganib na ilegal na droga upang magkaroon ng ligtas at mapayapang komunidad.
Source: SPD PIO
Panulat ni PSSg Remelin M Gargantos
