Calayan, Cagayan – Tinatayang Php360,000 halaga ng marijuana ang nasamsam ng Cagayan PNP sa isinagawang operasyon sa Brgy. Babuyan, Claro Island, Calayan, Cagayan nito lamang Miyerkules, Hunyo 1, 2022.
Kinilala ni Police Colonel Renell Sabaldica, Provincial Director ng Cagayan Police Provincial Office, ang mga suspek na sina Erizald Rosales, 44, at Rodrigo Linsangan Jr., 59 at isang lisensyadong guro.
Ayon kay PCol Sabaldica, bandang 6:00 ng hapon, nagsagawa ng operasyon ang mga operatiba ng Calayan Municipal Police Station matapos makatanggap ang kanilang himpilan ng impormasyon na ang mga suspek ay gumagamit ng ipinagbabawal na gamot at nagtatanim ng marijuana sa likod ng bahay ni Rosales.
Hinuli ang mga suspek matapos maaktuhan ng mga pulis na kumukuha ng labinlimang full grown uprooted marijuana na may timbang na tatlong kilo at nagkakahalaga ng Php360,000.
Nahaharap sina Rosales at Linsangan sa kasong paglabag sa Art. II sec 16 at 11 ng Republic Act 9165 o Comprehensive Dangerous Drugs Act of 2002.
Ang matagumpay na operasyong ito ng Cagayano Cops ay resulta ng kanilang mas pinaigting na kampanya laban sa ilegal na droga at pakikipagtulungan ng komunidad sa Pambansang Pulisya.
Source: Calayan Municipal Police Station
###
Panulat ni Police Staff Sergeant Mary Joy D Reyes
