Iloilo City – Tinatayang nasa Php353,600 na halaga ng shabu ang nakumpiska sa suspek na nahuli sa isinagawang anti-illegal drugs operation ng pulisya sa Iloilo City nito lamang Lunes, Mayo 2, 2022.
Kinilala ni Police Brigadier General Flynn Dongbo, Regional Director ng Police Regional Office 6 ang nahuling suspek na si July Roga y Galapin, 31, walang trabaho, residente ng Zone 3 Bo. Obrero Lapuz, Iloilo City at itinuturing na isang High Value Individual.
Ayon kay PBGen Dongbo, naaresto si Roga bandang 9:00 ng gabi sa kanyang lugar na tinitirhan sa buy-bust operation na isinagawa ng mga operatiba ng Regional Drug Enforcement Unit 6 at Iloilo City Police Station 2 Drug Enforcement Team.
Narekober sa suspek ang 11 plastic sachet na naglalaman ng hinihinalang shabu na humigit-kumulang 52 grams na may tinatayang Standard Drug Price na Php353,600.
Ang suspek ay isinailalim sa surveillance ng pulisya sa loob ng halos dalawang buwan.
Dati siyang inaresto dahil sa kasong may kinalaman sa droga noong 2019 at nakapag-avail ng plea bargaining.
Pinuri naman ni Police Brigadier General Flynn Dongbo, Western Visayas top cop ang kamakailang nagawa ng joint police operatives.
“Itong kamakailang pag-aresto ay nagsisilbing babala sa mga bumabalik at nakikisali pa rin sa ilegal na droga na huminto sa inyong mga ilegal na gawain. Kung magpapatuloy ka, mas maagang aabutan ka ng mahabang braso ng batas at sasagutin ka sa pagkakasala na ginawa mo.” Dagdag pa ni PBGen Dongbo.
Sa ngayon, nasa kustodiya ng Iloilo City Police Station 2 ang suspek para sa pagsasampa ng kasong paglabag sa Republic Act 9165 o kilala bilang Comprehensive Dangerous Drugs Act of 2002.
###
Panulat ni PMSg Leah Lyn Q Valero
