Lapu-Lapu City, Cebu – Nakumpiska ang tinatayang nasa Php34 milyong halaga ng shabu sa isang suspek na High Value Individual (HVI) sa buy-bust operation na ikinasa ng mga operatiba ng PNP, PAF at PDEA sa Brgy. Ibo, Lapu-Lapu City, Cebu nito lamang ika-14 ng Oktubre 2022.
Kinilala ni Police Colonel Elmer S Lim, Officer-In-Charge ng Lapu-Lapu City Police Office (LCPO), ang naaresto na si Rosell Morales Arda a.k.a “Janet”, 42, residente ng Brgy. Poblacion Occidental, Consolacion, Cebu na kabilang sa talaan ng HVI ng naturang lungsod.
Ayon kay Police Colonel Lim, naaresto si Morales bandang 3:25 ng hapon nitong Biyernes sa magkatuwang na operasyon ng mga miyembro ng City Intelligence at Drug Enforcement Unit ng LCPO, Regional Intelligence Division 7, Naval Forces Central Visayas, Philippine Air Force, at ng Philippine Drug Enforcement Agency.
Kabilang sa mga nakuha mula sa nasabing operasyon ang nasa 5 kilo ng hinihinalang shabu na may Standard Drug Price na Php34,000,000 at boodle money.
Mahaharap ang suspek sa kasong paglabag sa RA 9165 o ang Comprehensive Dangerous Drugs Act of 2002.
Ang matagumpay na operasyon ay patunay sa maayos, mahusay, at mas pinaigting na kampanya ng mga pulisya kontra ilegal na droga at maging sa iba’t ibang uri ng kriminalidad para sa pagtupad sa isang ligtas, mapayapa at maunlad na komunidad.
