Nasabat ang tinatayang Php34 milyong halaga ng shabu sa isang High Value Target sa isinagawang buy-bust operation ng PNP-PDEA sa Barangay Matalin, Malabang, Lanao del Sur noong ika-8 ng Abril 2024.
Kinilala ni Police Brigadier General Prexy D Tanggawohn, Regional Director ng PRO BAR, ang suspek na si alyas “Dats”, 30 at residente ng Barangay Bagua 2, Cotabato City.
Naging matagumpay ang isinagawang buy-bust operation ng mga operatiba ng PNP Drug Enforcement Group BAR katuwang ang Philippine Drug Enforcement Agency BARMM, Highway Patrol Group BAR, National Intelligence Coordinating Agency BARMM, National Bureau of Investigation BARMM, 32nd Infantry Battalion, 11 Infantry Division Philippine Army, 3rd Scout Ranger, Philippine Drug Enforcement Unit – Philippine Special Operations Group, 2nd Provincial Mobile Force Company LDSPPO at Malabang Municipal Police Station.
Nakumpiska mula sa naarestong suspek ang limang piraso ng yellow aluminum foil bags na pinaghihinalaang shabu na may timbang na 5000 gramo na tinatayang nagkakahalaga ng Php34,000,000, buy-bust money, isang yunit ng mobile phone, iba’t ibang ID, mga resibo at isang yunit ng Toyota Avanza.
Mahaharap naman ang suspek sa kasong paglabag sa Republic Act 9165 o “Comprehensive Dangerous Drugs Act of 2002” kapag napatunayang nagkasala ito.
Patunay lamang na ang Pambansang Pulisya ng Pilipinas ay lalo pang paiigtingin ang kampanya kontra kriminalidad partikular ang ilegal na droga at hinihikayat ang mga mamamayan na suportahan ang pulisya sa pagkamit ng ligtas, tahimik at maunlad na bagong Pilipinas.
Panulat ni Pat Ma. Señora Agbuya
