Tinatayang nasa Php349,996 na halaga ng shabu ang nasabat sa isang High Value Individual (HVI) sa isinagawang anti-illegal drugs operation ng Drug Enforcement Team ng Binangonan Municipal Police Station sa Barangay Darangan, Binangonan, Rizal nito lamang ika-18 ng Pebrero 2025.
Kinilala ni Police Brigadier General Paul Kenneth T Lucas, Regional Director ng PRO 4A, ang suspek na si alyas “Joel”, 47 taong gulang at residente ng nasabing lugar.
Bandang 3:20 ng umaga nang ikasa ang operasyon na nagresulta sa pagkakasabat ng 5 plastic sachet na naglalaman ng hinihinalang shabu na may bigat na 51.47 gramo na nagkakahalaga ng humigit kumulang Php349,996, cellphone, isang pitaka, at buy-bust money.
Ang nahuling suspek kasama ang mga nakalap na ebidensya ay dinala sa Binangonan Municipal Police Station para sa imbestigasyon at tamang disposisyon at pagkatapos ay dadalhin sa Rizal Provincial Forensic Unit para sa laboratory at drug test examination habang inihahanda ang kasong paglabag sa Republic Act 9165 o “Comprehensive Dangerous Drugs Act of 2002” laban sa suspek.
Pinupuri naman ni PBGen Lucas ang matagumpay na operasyon at muling binigyang-diin ang matibay na paninindigan ng PRO 4A laban sa ilegal na droga.
“Isang tagumpay ito hindi lamang para sa mga tagapagpatupad ng batas kundi para sa mga tao ng Binangonan. Bawat operasyon ng droga na aming pinapatigil ay isang hakbang patungo sa mas ligtas na komunidad. Ngunit hindi namin ito kayang gawin ng mag-isa. Hinihimok namin ang publiko na manatiling mapagbantay at iulat ang mga kahina-hinalang aktibidad, sama-sama nating gawing drug-free ang CALABARZON,” saad ni PBGen Lucas.
Source: PRO 4A
Panulat ni Patrolwoman Pricelle May T Urbano
