Talisay City, Cebu – Tinatayang nasa Php374,000 ang halaga ng shabu ang nakumpiska ng PNP sa isang High Value Individual na nasakote sa buy-bust operation sa Brgy Lawaan III, Talisay City nito lamang Sabado, Mayo 21, 2022.
Kinilala ni Police Lieutenant Colonel Randy Caballes, Chief of Police ng Talisay City Police Station, ang nahuling suspek na si Michael Manila Laurenciana alyas “Baki”, 32 taong gulang, at kabilang sa High Value Individual ng naturang lungsod.
Ayon kay Police Lieutenant Colonel Caballes, pasado 10:00 ng umaga nang masakote ang suspek sa buy-bust operation ng mga operatiba ng Talisay City Police Station.
Ayon pa kay Police Lieutenant Colonel Caballes, nakuha mula sa suspek ang nasa tinatayang 55 gramo ng shabu na may Standard Drug Price na Php374,000, buy-bust money, at isang brown pouch na ginamit bilang lalagyan ng mga ilegal na droga.
Ang naturang suspek ay mahaharap sa kasong paglabag sa RA 9165 o ang Comprehensive Dangerous Drugs Act of 2002.
Tiniyak naman ng hanay ng Police Regional Office 7 na hindi sila hihinto sa kanilang mga hakbangin upang mapagtagumpayan ang kampanya laban sa ilegal na droga at tuluyang maging drug free ang Rehiyon Siete sa pamumuno at pangangasiwa ng Regional Director ng PRO 7, Police Brigadier General Roque Eduardo DP Vega.
###
