Lucena City, Quezon – Tinatayang Php346,800 halaga ng shabu ang nasabat sa isang suspek sa ikinasang PNP buy-bust operation nito lamang Biyernes, Oktubre 7, 2022.
Kinilala ni Police Brigadier General Jose Melencio Nartatez Jr, Regional Director ng Police Regional Office 4A, ang suspek na si Jayson Lontok Canales alyas “Bakla”, 34, residente ng Purok Pag-Asa, Brgy. Cotta, Lucena City, Quezon.
Ayon kay PBGen Nartatez Jr, bandang 1:28 ng madaling araw naaresto ang suspek sa Villa San Pablo Subd., Brgy. Ibabang Iyam, Lucena City, Quezon ng pinagsamang puwersa ng PNP Drug Enforcement Unit/Provincial Intelligence Unit-Quezon, Philippine Drug Enforcement Agency 4A at Lucena City Police Station Intel/Station Drug Enforcement Unit.
Narekober sa suspek ang dalawang pirasong heat-sealed transparent plastic sachets ng hinihinalang shabu na may timbang na 17 gramo at tinatayang nagkakahalaga ng Php346,800, isang pirasong Php1,000 bill at Php11,000 bilang boodle money, isang brown coin purse at isang kulay itim at pula na motorsiklo SKY GO.
Nahaharap ang suspek sa kasong paglabag sa Section 5 at 11, Article ll ng Republic Act 9165 o Comprehensive Dangerous Drugs Act of 2002.
Ang Quezon PNP ay hindi titigil sa pagsugpo sa mga ilegal na gawain upang tuluyan ng mawakasan ang anumang uri ng kriminalidad na dulot ng ilegal na droga sa buong probinsya.
Source: Police Regional Office 4A
Panulat ni Police Staff Sergeant Donabel T Dulin
