Nakumpiska ng mga tauhan ng Taguig City Police Station ang tinatayang Php345,916 na halaga ng shabu sa ikinasang buy-bust operation sa Barangay Central Signal, Taguig City nito lamang Biyernes, Pebrero 21, 2025.
Kinilala ni Police Brigadier General Manuel J Abrugena, District Director ng Southern Police District, ang suspek na kinilalang si alyas “Rommel,” 47, lalaki, tricycle driver at residente ng Barangay Lower Bicutan, Taguig City.
Ayon kay PBGen Abrugena, nakumpiska ng Taguig PNP ang tatlong heat-sealed plastic sachets na naglalaman ng hinihinalang shabu na tumitimbang ng 50.87 gramo at may tinatayang halaga na Php345,916, isang tunay na Php500 bill na ginamit bilang buy-bust money, dalawang piraso ng Php1,000 boodle money, isang pink na pouch at isang itim na coin purse, at isang 9mm revolver na may apat na bala.
Nahaharap sa kasong paglabag sa Sections 5 at 11 ng Article II ng Republic Act 9165 o “Comprehensive Dangerous Drugs Act of 2002”, gayundin sa Republic Act 10591 o “Comprehensive Firearms and Ammunition Regulation Act” in relation to Republic Act 7166 (Omnibus Election Code) ang suspek.
Hinihimok ng Southern Police District ang publiko na manatiling mapagbantay at mag-ulat ng mga ilegal na aktibidad sa kanilang komunidad sa pagpapanatili ng kapayapaan sa ating bansa.
Source: SPD PIO
Panulat ni PMSg Remelin M Gargantos
