Taguig City — Mahigit Php344,000 halaga ng shabu ang nakumpiska sa isang lalaki matapos magsagawa ng buy-bust operation ang Taguig City Police Station nito lamang Biyernes, Mayo 5, 2023.
Kinilala ni Police Brigadier General Kirby John Kraft, District Director ng Southern Police District, ang suspek na si alyas “Vincent”, 37 taong gulang.
Ayon kay PBGen Kraft, naganap ang operasyon bandang 10:15 ng gabi sa kahabaan ng Bañares St., Brgy. Central Bicutan, Taguig City ng mga tauhan ng Station Drug Enforcement Unit (SDEU) ng Taguig CPS na nagresulta sa pagkakaaresto ng suspek.
Nasamsam sa operasyon ang siyam na heat-sealed transparent plastic sachet na naglalaman ng hinihinalang shabu, na may tinatayang timbang na 50.65 gramo at nagkakahalaga ng Php344,420; isang itim na purse at isang Php500 na ginamit bilang buy-bust money.
Mahaharap ang suspek sa kasong paglabag sa RA 9165 o Comprehensive Dangerous Drugs Act of 2002.
Source: SPD PIO
Panulat ni PSSg Remelin M Gargantos
