General Santos City – Arestado ang dalawang tulak ng ilegal na droga na parehong nakalista bilang High Value Individual (HVI) matapos makuhanan ng Php340,000 halaga ng shabu sa isinagawang buy bust operation ng mga otoridad sa Purok 19, Santiago St, Brgy. Lagao, General Santos City nito lamang ika-21 ng Agosto 2023.
Kinilala ni Police Brigadier General Jimili Macaraeg, Regional Director ng Police Regional Office 12, ang mga naarestong suspek na sina alyas “Moder”, 37 at si alyas “Suharto”, 30, pawang residente ng Brgy. Barurao, Sultan Sa Barongis, Maguindanao.
Batay sa ulat na natanggap ni PBGen Macaraeg, dakong 11:28 ng umaga nang ikinasa ang anti-illegal drug entrapment operation sa pangunguna ng PDEA 12 katuwang ang mga operatiba ng GenSan-Police Station 3, Regional Intelligence Division 12 at PDEA Sarangani.
Isang undercover agent ang nagawang makipagtransaksyon sa mga suspek at ng tanggapin nila ang marked money at boodle money mula sa police poseur buyer kapalit ng isang plastic sachet ng hinihinalang shabu ay agad silang dinamba ng mga operatiba.
Nakumpiska sa dalawang suspek ang 10-piraso ng transparent plastic sachets na naglalaman ng hinihinalang shabu na may kabuuang bigat na 50 gramo na nasa Php340,000 ang halaga, marked money, boodle money, at iba pang non-drug items.
Mahaharap ang dalawang suspek sa kasong paglabag sa RA 9165 o ang Comprehensive Dangerous Drugs Act of 2002.
Pinupuri naman ni PBGen Macaraeg ang dedikasyon ng mga operatiba na walang tigil na nagsisikap para mapanatili ang kaayusan ng komunidad sa pamamagitan ng pagtanggal sa banta ng ilegal na droga na siyang pangunahing ugat at sanhi ng kriminalidad.
Panulat ni Patrolman Khnerwin Jay A Medelin
