Paltok, Quezon City — Tinatayang nasa Php340,000 halaga ng shabu ang nakumpiska sa No. 2 Station Level Drug Priority Target at sa tatlo pa nitong kasabwat sa isinagawang buy-bust operation ng Masambong Police Station 2 ng QCPD nito lamang Huwebes, Oktubre 13, 2022.
Kinilala ni Quezon City Police District (QCPD) Director, PBGen Nicolas D Torre III, ang mga suspek na sina Eric Flojo, 40 anyos na syang No. 2 Drug Priority Drug Target; at ang kanyang mga kasamahan na sina Zalde Espigon, 58 at Jurry Bernando, 34, pawang mga residente ng Brgy. Paltok, Quezon City, at Michael Torres, 38, residente naman ng Victoria Tower, Panay Ave., Quezon City.
Ayon kay PBGen Torre lll, naaresto ang mga suspek bandang 1:30 ng madaling araw sa harap ng No. 17 Ilagan St., Brgy. Paltok, Quezon City ng mga operatiba ng Masambong PS-2.
Ayon pa kay PBGen Torre lll, dati nang naaresto ang suspek na si Flojo dahil sa paglabag sa R.A. 9165 ngunit nag-avail ito ng plea-bargaining noong 2019 kung saan patuloy pa rin siyang sinusubaybayan at kalaunan ay na-verify na bumalik siya sa pagbebenta ng droga.
Dagdag pa niya, sa kanilang operasyon, isang operatiba ng pulisya ang umaktong poseur buyer at bumili ng Php8,500 halaga ng shabu kay Flojo kasama ang kanyang tatlong kasamahan. Pagkatapos ng pre-arranged signal, saka sila inaresto.
Dito na nasamsam sa mga suspek ang buy-bust money at 11 heat-sealed transparent plastic sachet ng humigit-kumulang 50 gramo ng hinihinalang shabu na ang bigat ay nagkakahalaga ng Php340,000.
Samantala, paglabag sa R.A. 9165 o Comprehensive Dangerous Drugs Act of 2002 ang isinampa sa mga suspek.
Pinuri ni PBGen Nicolas D Torre III ang mga operatiba sa kanilang walang tigil na anti-illegal drug operations na nagresulta sa pagkakaaresto sa mga suspek. “Di po ako magsasawang manawagan sa ating mamamayan na tigilan na ang ganitong ilegal na gawain dahil ang pulisya ng QCPD ay hindi magsasawang magsagawa ng ganitong operasyon upang kayo ay puksain,” aniya.
Source: PIO QCPD
Panulat ni PSSg Remin M Gargantos
