Malolos City, Bulacan – Tinatayang nasa Php340,000 halaga ng shabu ang nakumpiska sa dalawang suspek sa buy-bust operation ng Bulacan PNP nito lamang Martes, Hunyo 14, 2022.
Kinilala ni Police Major Russell Dennis Reburiano, Acting Chief, Provincial Intelligence Unit, Bulacan Police Provincial Office, ang mga suspek na sina Gerrad Pascual y Flores, 39, pedicab driver, residente ng Villareal St. Brgy. Gulod, Novaliches, Quezon City at Judjane Solivio y Ulgasan, 41, taxi driver, residente ng Western Bicutan, Taguig City.
Ayon kay PMaj Reburiano, bandang 12:10 ng madaling araw naaresto ang mga suspek sa Brgy. Mojon, Malolos City, Bulacan sa pinagsanib na puwersa ng Malolos City Police Station, Bulacan Provincial Drug Enforcement Unit at Provincial Intelligence Unit, Bulacan PPO
Dagdag ni PMaj Reburiano, nakumpiska mula sa mga suspek ang nasa humigit kumulang 50 gramo ng hinihinalang shabu na may tinatayang halaga na Php340,000 pesos at Php4000 bilang marked money.
Nahaharap ang mga suspek sa kasong paglabag sa Section 5 at 11 Article III ng Republic Act 9165 o Comprehensive Dangerous Drugs Act of 2002.
Patuloy pa rin ang ginagawang operasyon ng PNP para tuluyang mahuli ang mga nagbebenta at gumagamit ng ilegal na droga at maging malaya ang ating bansa sa ipinagbabawal na gamot na sumisira sa kinabukasan ng ating mamamayan lalo na sa mga kabataan.
###
Panulat ni Police Corporal Jeselle V Rivera
