Cagayan de Oro City – Tinatayang Php340,000 halaga ng shabu ang nasabat sa buy-bust operation ng Regional Drug Enforcement Unit 10 sa Purok 1A, Zone 1A, Brgy. Tablon, Cagayan de Oro City nito lamang Lunes, Oktubre 17, 2022.
Kinilala ni Police Brigadier General Lawrence Coop, Regional Director ng Police Regional Office 10, ang suspek na si Jonilo T. Pecasis, 39, residente ng nasabing lugar.
Ayon kay PBGen Coop, bandang 9:45 ng gabi nang nadakip ang suspek ng mga tauhan ng Regional Drug Enforcement Unit 10, Police Station 2 ng Cagayan de Oro City Police Office at Regional Special Operation Unit 10.
Nakumpiska mula sa suspek ang walong paketeng hinihinalang shabu na may timbang na 50 gramo na tinatayang nagkakahalaga ng Php340,000, isang mobile phone at isang pirasong Php1,000 bill na ginamit bilang buy-bust money.
Ang suspek ay nahaharap sa kasong paglabag sa RA 9165 o Comprehensive Dangerous Drugs Act of 2002.
“Ipagpatuloy lang natin ang ating kampanya laban sa ilegal na droga at sana ay magsilbing inspirasyon ito sa lahat, hindi lamang sa ating mga kapulisan kundi pati na rin sa komunidad, na magtulungan sa anumang mandato o programa ng gobyerno upang ating makamtan ang isang progresibo at mapayapa na pamayanan,” pahayag ni PBGen Coop.
Panulat ni Patrolman Edwin Baris/RPCADU 10
