Davao Oriental – Tinatayang Php340,000 halaga ng hinihinalang shabu ang nasabat sa isinagawang buy-bust operation ng PNP at PDEA nito lamang Huwebes, Setyembre 8, 2022.
Kinilala ni PLtCol Ernesto Gregore, Chief of Police ng Mati City Police Station, ang mga suspek na si alyas “Abdul”, 26, residente ng Purok Masagana, Brgy. Mayo, Mati City at alyas “Alberto”, 52, residente ng Menzi, Brgy. DMM, Mati City na tinaguriang Top 5 High Value Individual sa regional level.
Ayon kay PLtCol Gregore, naaresto ang mga suspek sa Purok Centro, Sitio Taganilao, Brgy. Tamisan, Mati City, Davao Oriental ng pinagsamang tauhan ng Mati CPS at PDEA XI-Davao Oriental Provincial Office katuwang ang Regional Police Drug Enforcement Unit 11 at Regional Intelligence Division Provincial Intelligence Team.
Dagdag pa ni PLtCol Gregore, nakuha mula sa mga suspek ang ilang pakete ng hinihinalang shabu na may bigat na humigit kumulang 50 gramo at tinatayang may street market value na Php340,000 at marked money na ginamit sa operasyon.
Ang mga suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Pinuri naman ni PBGen Benjamin Silo Jr., PRO11 Regional Director ang nasabing operasyon dahil sa matagumpay na pagkakadakip sa suspek na lalong maglalapit sa kanilang layunin na gawing drug-free ang rehiyon onse.
Sa pamamagitan ng pagtutulungan ng mamamayan, kapulisan at pagkakaroon ng malasakit sa komunidad ay makakamit ang pagkakaisa tungo sa kaunlaran ng bansa.
Panulat ni Patrolman Alfred Vergara
