Antipolo City, Rizal – Nakumpiska ang tinatayang Php340,000 halaga ng shabu sa isang suspek sa isinagawang operasyon ng Antipolo PNP at PDEA nito lamang Linggo, Mayo 22, 2022.
Kinilala ni Police Lieutenant Colonel June Paolo Abrazado, Acting Chief of Police ng Antipolo City Police Station ang suspek na si Asnor Ontawar y Lumpa alyas Asnor, 19, residente ng Phase 4, Barangay Dela Paz, Antipolo City.
Ayon kay Police Lieutenant Colonel Abrazado, bandang 10:10 ng gabi naaresto ang suspek sa naturang barangay sa isinagawang buy-bust operation ng City Drug Enforcement Team ng Antipolo City Police Station at Philippine Drug Enforcement Unit 4A.
Dagdag pa ni Police Lieutenant Colonel Abrazado, nakumpiska sa suspek ang limang piraso na heat-sealed transparent plastic sachet ng shabu na may tinatayang bigat na 50 gramo na nagkakahalaga ng Php340,000, isang coin purse at isang Php1,000 na ginamit bilang buy-bust money.
Nahaharap ang suspek sa kasong paglabag sa section 5 at 11 ng Republic Act 9165 o Comprehensive Dangerous Drugs Act of 2002.
Ang tagumpay ng PNP sa pagsugpo sa ilegal na droga at iba pang mga krimen ay bunga ng suporta at pakikipagtulungan ng mamamayan upang mapanatiling ligtas at maayos ang komunidad.
###
Police Executive Master Sergeant Joe Peter V Cabugon
