Pinapurihan ni PNP Chief, Police General Guillermo Lorenzo T. Eleazar ang matagumpay na anti-illegal drugs operation ng mga awtoridad sa Sucat, Parañaque City kung saan nakumpiska ang Php34 milyon halaga ng hinihinalang shabu.
Batay sa report, naaresto ang suspek sa buy-bust operation na kinilalang si Kenneth Vito Cruz.
“I would like to commend our personnel and the PDEA for the confiscation of large quantity of shabu in an operation in Parañaque City. Ito ay isang patunay na naman ng magandang ugnayan ng dalawang ahensya sa ating mahigpit na kampanya laban sa iligal na droga,” ani PGen Eleazar.
Matatandaang lumagda ng kasunduan ang PNP at PDEA noong Hulyo upang mas mapalakas ang information-sharing at interoperability ng dalawang (2) partido matapos ang insidente ng misencounter sa Quezon City.
Inaasahan ang patuloy na operasyon ng mga sindikato ng iligal na droga kaya tinapatan ito ng whole-of-government approach mula sa pagbabantay sa territorial waters at coastline kung saan ipinupuslit ang shabu hanggang sa intelligence-gathering at pagsasagawa ng agresibong operasyon laban sa kanilang mga galamay sa bansa, ayon kay PNP Chief Eleazar.
“Nakatutok man ang inyong kapulisan sa pandemya at mga preparasyon sa halalan, tinitiyak ko sa ating mga kababayan na hindi namin binibitawan ang aming adhikain na linisin ang ating bansa ng iligal na droga na nananatiling banta lalo na sa ating mga kabataan,” dagdag ng hepe.
Bukod sa apat (4) na kilo ng shabu, nakumpiska rin ng mga operatiba ang Php1,000 at isang mobile phone mula sa suspek na nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Patuloy ang follow-up investigation na isinasagawa ng pulisya upang matukoy ang supplier ng nasabat na droga.
#####
Article by Police Corporal Josephine T Blanche
