Davao City – Tinatayang Php320,000 halaga ng hinihinalang shabu ang nasabat sa isinagawang buy-bust operation ng sa Purok 25-A, Lower Malagamot, Panacan, Davao City, Oktubre 23, 2022.
Kinilala ni PMaj Jake Goles, Station Commander ng Sasa Police Station, ang target sa operasyon na si alyas “Taba”, 35, residente ng nasabing lugar at tinaguriang Top 1 City High Value Target, kasama din sa naaresto ang live-in partner nito na si alyas “Anna”, 33, at isang alyas “Charlie”, 19, na residente ng Sitio Mabuhay, Carmen Davao del Norte.
Ayon kay PMaj Goles, naaresto ang mga suspek sa isinagawang buy-bust operation ng mga tauhan ng Sasa Police Station kasama ang Davao City Maritime Police Station at sa pakikipag-ugnayan sa PDEA XI.
Dagdag pa ni PMaj Goles, nakuha mula sa mga suspek ang ilang pakete ng hinihinalang shabu na may bigat na humigit kumulang 20 gramo at may street market value na Php320,000 at marked money na ginamit sa operasyon.
Ang mga suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Ang pagkakadakip sa suspek ay maglalapit sa layunin ng Police Regional Office 11 na gawing drug-free ang rehiyon onse at sa malasakit na ipinapakita ng kapulisan sa mga mamamayan ay makakamit ang kaayusan at kapayapaan tungo sa kaunlaran ng bansa.
Panulat ni Patrolman Alfred Vergara
