Nasabat ng mga tauhan ng Panabo City Police Station ang Php300,000 halaga ng hinihinalang shabu sa Purok 17, Villarosa, Barangay New Visayas, Panabo City, Davao Del Norte nito lamang ika-8 ng Abril 2024.
Kinilala ni Police Lieutenant Colonel Jun A Bautista, Station Commander ng Panabo CPS, ang suspek na si alyas “Carlos”, residente ng Malagamot, Barangay Panacan, Davao City kung saan narekober mula sa kanya ang isang pakete ng hinihinalang shabu na may bigat na humigit kumulang 25 gramo at buy-bust money.
Ayon kay PLtCol Bautista, naihain ang Warrant of Arrest ng pinagsanib na puwersa ng mga tauhan ng Panabo CPS, Regional Police Drug Enforcement Unit 11, 2nd Provincial Mobile Force Company at Philippine Drug Enforcement Agency (PDEA).
Ang suspek ay mahaharap sa kasong paglabag sa Republic Act 9165 o Comprehensive Dangerous Drugs Act of 2002.
Samantala, ang laban kontra kriminalidad lalo na ang usaping ilegal na droga ay patuloy na pinapaigting ng Police Regional Office 11 sa pamumuno ni Regional Director, Police Brigadier General Alden B Delvo alinsunod sa kampanya ng Bagong Pilipinas na panatilihin ang kapayapaan at kaayusan tungo sa pagsulong ng bansa.
Panulat ni Pat Shairra Rose A Aquino
