NCRPO – Tinatayang Php3 milyong halaga ng shabu ang nakumpiska sa isinagawang Anti-Illegal Drug operation ng National Capital Region Police Office mula Hulyo 1 at 2, 2022.
Sa Southern Police District, sa pamumuno ni District Director Police Brigadier General Jimili Macaraeg, bandang 9:30 ng gabi ng Hulyo 1, 2022, arestado sa buy-bust ng Station Drug Enforcement Unit ng Las Pinas City Police Station ang dalawang suspek sa kahabaan ng Zapote River Drive, Barangay Zapote, Las Piñas City.
Nakumpiska sa kanila ang humigit-kumulang 300 gramo ng hinihinalang shabu na nagkakahalaga ng Php 2,040,000.
Kasunod nito, sa parehong araw hanggang hating-gabi ng Hulyo 2, 2022, nagsagawa rin ng tatlong magkahiwalay na operasyon ang Quezon City Police District sa pangunguna ni District Director PBGen Remus Medina sa kahabaan ng Brgy. Kaligayahan, Brgy. Gulod, at Brgy. Greater Fairview, Quezon City na humantong sa pagkahuli sa walong drug suspect.
Narekober sa possession at control ng mga suspek ang humigit-kumulang 225 gramo ng hinihinalang shabu na may Standard Drug Price na Php764,000.
Samantala, sa direksyon ni PBGen Orlando Yebra Jr., bandang 1:30 AM ng Hulyo 2, 2022, nadakip ng pulisya ang isang bagong kinilalang High Value Individual (HVI) sa kahabaan ng Blk. II Bolante II Asilo Ville, Brgy. Pinagbuhatan, Pasig City kung saan nasabat sa kanya ang humigit-kumulang 51 gramo ng shabu na nagkakahalaga ng Php346,000.
Lahat ng mga nakuhang ebidensya ay itinurn-over sa kani-kanilang Forensic Units.
Nahaharap naman ang mga suspek sa paglabag sa RA 9165 o Comprehensive Dangerous Drugs Act of 2002.
Pinuri ng PMGen Felipe R Natividad, Regional Director ng NCRPO ang bawat operating unit para sa mahusay na trabaho at sa kanilang patuloy na pagsisikap sa pagpuksa sa ilegal na droga sa rehiyon.
“Ang patuloy na pagsisikap ng ating mga tauhan na nagresulta sa pagka-aresto sa mga drug personality na ito at pagkumpiska ng malaking halaga ng ilegal na droga ay tunay na kahanga-hanga. Ito ay sumasalamin sa ating walang pagod na pagtatrabaho habang tayo ay nangangako na patuloy na paiigtingin ang kampanya laban sa ilegal na droga,” ani PMGen Natividad.
Source: PIO NCRPO
###
Panulat ni PSSg Remelin Gargantos
