Tawi-Tawi – Narekober ang Php3,740,000 halaga ng hinihinalang shabu habang patay naman ang suspek matapos makipagpalitan ng putok sa mga operatiba ng PNP at Marines sa Brgy. Tubig Tanah, Bongao, Tawi-Tawi nito lamang Lunes, Mayo 16, 2022.
Kinilala ni Police Captain Kuhutan Hora Imlani Jr, Office-in-Charge, Bongao Municipal Police Station ang suspek na si Akmarahim Jainal.
Ayon kay PCpt Imlani Jr, matapos makatanggap ng tawag mula sa isang concerned citizen patungkol sa pagbebenta ng ilegal na droga ay kaagad nila itong tinungo para beripikahin.
Ayon pa kay PCpt Imlani Jr, pagkarating ng mga operatiba sa lugar ay nagkaroon ng palitan ng putok ng baril sa pagitan ng mga operatiba at ng suspek na nagresulta sa pagkamatay nito.
Ang operasyon ay pinagsanib na puwersa ng Bongao MPS, 1st Special Operation Unit-Maritime Group at Marine Battalion Landing Team-12.
Dagdag pa ni PCpt Imlani Jr, narekober mula sa pinangyarihan ng krimen ang 10 plastic straw na naglalaman ng hinihinalang shabu na tinatayang may timbang na 550 gramo at nagkakahalaga ng Php3,740,000, isang backpack, dalawang kalibre .45 pistol, isang kalibre 9mm pistol, sari-saring magazine at bala, isang hand grenade, isang rifle grenade, isang digital weighing scale, isang cellphone, Php57,763 na drug money at isang Honda Wave 100cc na motorsiklo.
Ang Pambansang Pulisya ay hindi tumitigil sa pagpapaalala sa mamamayan na huwag gumawa ng ano mang ilegal na gawain o aktibidad upang hindi humantong sa pagkakakulong, bagkus ay makipagtulungan sa ating kapulisan upang makamtan ang mapayapang pamayanan.
###
Panulat ni Patrolman Charlie Nasroden Corpuz
