San Pablo City, Laguna – Tinatayang Php3,750,000 halaga ng marijuana ang nasabat sa isang vlogger at dalawang suspek sa isinagawang buy-bust operation ng San Pablo City PNP nito lamang Sabado, Setyembre 10, 2022.
Kinilala ni Police Colonel Randy Glenn Silvio, Officer-In-Charge, Laguna Police Provincial Office, ang mga suspek na sina Jerome Zapanta, alyas “Jhem Bayot”, 31, vlogger; Ginalyn Pintang Benisa, alyas “Nalyn”, 30, helper, at Crismark Balboa Alimagno, alyas “Lake”, 21, helper; pawang mga residente ng Brgy. San Isidro, San Pablo City, Laguna.
Ayon kay PCol Silvio, bandang 3:18 ng madaling araw naaresto ang tatlong suspek sa nabanggit na barangay ng mga operatiba ng San Pablo City Police Station.
Narekober mula sa mga suspek ang 10 pirasong heat-sealed transparent plastic sachets ng pinaghihinalang High Grade Marijuana na may timbang na 2.5 kilogramo at tinatayang nagkakahalaga ng Php3,750,000, tatlong pirasong Php500 bill na ginamit bilang buy-bust money, isang pirasong Php500 at isang luggage bag.
Nahaharap ang mga suspek sa kasong paglabag sa Section 5 at 11, Article II ng Republic Act 9165 o Comprehensive Dangerous Drugs Act of 2002.
Patuloy ang Laguna PNP sa pagpapaigting sa kampanya laban sa ilegal na droga para maiwasang masangkot ang mga kabataan at walang buhay na mapapariwara dahil dito.
Source: Laguna Police Provincial Office PIO
Panulat ni Police Staff Sergeant Donabel Dulin
