Cebu City – Timbog sa buy-bust operation ng PNP at PDEA sa Cebu City ang isang High Value Individual na drug suspek matapos mahulihan ng mahigit kalahating kilo ng ilegal na droga noong Sabado, Pebrero 11, 2023.
Kinilala ni Police Major Efren Dela Cruz Diaz Jr., Station Commander ng Police Station 1 ng Cebu City Police Office, ang suspek na si alyas “Mayko”, 43, residente ng Sitio Nazareth Cadasig, Brgy. Buhisan, Cebu City.
Ayon kay Police Major Diaz, nadakip ang suspek dakong ala-1:40 ng madaling araw sa M. Lazarte St., Brgy. Pari-an Cebu City.
Nakumpiska mula rito ang nasa 16 na sachet ng hinihinalang shabu na may timbang na 550 gramo na nagkakahalaga ng Php3,740,000, isang black belt bag, at buy-bust money.
Sasampahan ng kasong paglabag sa Sec. 5 at 11, Art. II ng RA 9165 o ang Comprehensive Dangerous Drugs Act of 2002 ang suspek.
Tiniyak ng mga awtoridad na ang kanilang mga hakbangin na sugpuin ang ilegal na droga sa lungsod ay lalo pang pagbubutihin at paiigtingin para sa pagsusulong ng kaayusan at kapayapaan ng mamamayan.
