Cebu City – Kalaboso ang 39-anyos na lalake sa Cebu City matapos makumpiskahan ng milyon-milyong halaga ng ilegal na droga sa joint buy-bust operation ng mga operatiba ng Police Station (PS) 6 ng Cebu City Police Office (CCPO) at Philippine Drug Enforcement Agency (PDEA) nito lamang Huwebes, Enero 19, 2023.
Kinilala ni Police Major Francis Renz Talosig, Chief of Police, ang suspek na si alyas “Bongot” na nadakip dakong 11:55 ng gabi ng mga awtoridad sa kanila mismong lugar sa 1083 Tres De Abril Street, Brgy. Punta Princesa, Cebu City.
Nabatid na si “Bongot” ay nakapaloob sa talaan ng High Value Individual (HVI) sa Regional Level.
Nakumpiska mula sa suspek ang tinatayang nasa 530 gramo ng hinihinalang shabu na may Standard Drug Price (SDP) na Php3,604,000.
Nahaharap ang suspek sa kasong paglabag sa Sec. 5 at 11, Art. II ng RA 9165.
Pinuri naman at muling hinikayat ni Police Colonel Ireneo Dalogdog, City Director ng CCPO, ang buong hanay ng PS 6 sa maayos, maigting, at walang humpay na mga hakbang upang lutasin at wakasan ang problema sa ilegal na droga sa lungsod.
