Parañaque City — Umabot sa mahigit Php3 milyong halaga ng shabu ang nakumpiska sa dalawang suspek sa isinagawang buy-bust operation ng mga otoridad nito lamang Biyernes, Enero 20, 2023.
Kinilala ni PBGen Kirby John Kraft, ang mga suspek na sina alyas “Tita”, 34 taong gulang, at Jhonix, 23 taong gulang.
Ayon kay PBGen Kraft, bandang 9:00 ng gabi ay naaresto ang mga suspek sa 349 Quirino Ave corner 4 De Julio St., Brgy., Baclaran Parañaque City sa pinagsanib puwersa ng RDEU, PDEG SOU NCR, Drug Enforcement Unit- SPD, Drug Enforcement Unit ng Parañaque City Police Station at Pasay City Police Station kasama ang mga tauhan ng Substation 1 ng Parañaque CPS.
Narekober sa mga suspek ang walong heat-sealed transparent sachet at dalawang knot-tied plastic sachet na naglalaman ng hinihinalang shabu na humigit-kumulang 530 gramo ang bigat at nagkakahalaga ng tinatayang Php3,604,000.
Mahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002.
Patuloy namang susugpuin ng PNP ang mga nasa likod ng kalakaran ng ilegal na droga upang mapanatiling maayos ang seguridad ng bansa at ng sambayanang Pilipino.
Source: SPD PIO
Panulat ni PSSg Remelin M Gargantos
