Lucena City – Tinatayang Php3,600,000 halaga ng marijuana ang nakumpiska sa isang suspek sa buy-bust ng Quezon PNP nito lamang Huwebes, Abril 14, 2022.
Kinilala ni Police Colonel Joel Villanueva, Provincial Director ng Quezon Police Provincial Office, ang naarestong suspek na si Jero Salimbot Gantalao, alyas “Pacho”, 28, at residente ng Purok Pagkakaisa, Jael Subdivision, Brgy. Ilayang Iyam, Lucena City.
Ayon kay PCol Villanueva, nahuli si Pacho sa kanyang tirahan sa pinagsanib na operatiba ng Provincial Drug Enforcement Unit-Quezon Police Provincial Office; Philippine Drug Enforcement Unit-4A Quezon; Station Drug Enforcement Unit at Intel Unit ng Lucena City Police Station.
Nakumpiska mula sa suspek ang isang kulay green na eco bag na naglalaman ng limang bricks ng hinihinalang marijuana; isang blue eco bag na naglalaman ng apat na bricks ng hinihinalang marijuana; tatlong self-sealing plastic bag na naglalaman ng hinihinalang marijuana; 13 piraso na vacuum sealed plastic na may hinihinalang marijuana; isang piraso ng Php1,000 bill; at apat na piraso ng Php1,000 bill bilang boodle money.
Ang mga nasabat na hinihinalang marijuana ay may bigat na humigit-kumulang 10 kilo na may Street Value na Php3,600,000.
Mahaharap ang suspek sa kasong paglabag sa Sec 5 at 11 ng R.A. 9165 o Comprehensive Dangerous Drugs Act of 2002.
Ang matagumpay na operasyon na ito ay bunga ng pagpupursigi ng Quezon PNP upang ang kabataan at komunidad ay malayo sa perwisyong dulot ng ipinagbabawal na gamot.
###
Panulat ni Police Staff Sergeant Grace Neville Ortiz
