Cebu – Arestado ang isang drug suspect ng Lapu-lapu City PNP matapos makuhanan ng Php3.57 milyong halaga ng shabu sa isinagawang buy-bust operation sa New Terminal, Brgy. Pajo, Lapu-lapu City, Cebu nito lamang Lunes, Enero 02, 2023.
Kinilala ni Police Colonel Elmer Lim, City Director ng Lapu-lapu City Police Office, ang High Value Individual (HVI) na si alyas “Akang”, 35, residente ng Sitio Upper Ponce, Brgy. Capitol Site, Cebu City.
Nakuha mula sa suspek ang 525 gramo na pinaniniwalaang shabu na may Standard Drug Price na Php3,570,000, isang unit Samsung cellphone, sling bag at buy-bust money.
Ang suspek ay dati na ring naaresto sa parehong paglabag sa Sections 5 at 11, Article II ng RA 9165 sa Cebu City noong Agosto 20, 2022 at nakalaya sa pamamagitan ng piyansa.
Ang pagkakadakip sa suspek ay bunga ng matiyagang pagsubaybay ng mga tauhan ng City Drug Enforcement Unit at City Intelligence Unit ng Lapu-lapu City Police Office (LCPO) sa kanyang mga ilegal na aktibidad.
Ang Lapu-lapu City PNP ay patuloy na pangangalagaan ang kapakanan ng bawat mamamayan upang magkaroon ng kaayusan at kapayapaan tungo sa pag-unlad ng ating lungsod pagdating sa isyu ng pagpuksa sa ilegal na droga.
