Batangas City – Tinatayang Php3,450,000 halaga ng shabu ang nasabat sa dalawang High Value Individual (HVI) sa isinagawang buy-bust operation sa Brgy. Alangilan, Batangas City nito lamang Miyerkules, Setyembre 14, 2022.
Kinilala ni Police Brigadier General Jose Melencio Nartatez Jr., Acting Regional Director, Police Regional Office 4A, ang naaresto na si Noel Mangubat y Dela Peña, 45, walang asawa, painter, HVI, residente ng Wawa, Batangas City at Ainsley Asi y Aquino, 41, may asawa, walang trabaho, HVI, residente ng Lalayat, San Jose, Batangas.
Ayon kay PBGen Nartatez Jr, bandang 2:20 ng hapon naaresto ang suspek ng pinagsamang operatiba ng Regional Drug Enforcement Unit 4A, Regional Intelligence Division/Regional Special Operations Unit, Batangas City Police Station at Philippine Drug Enforcement Agency-Batangas.
Narekober mula sa suspek ang tatlong malaking nakabuhol na transparent plastic bag na naglalaman ng shabu na may timbang na 500 gramo at tinatayang nagkakahalaga ng Php3,450,000, isang pirasong Php1,000 bill na ginamit bilang buy-bust money, isang Mitsubishi Adventure na may Plate No. WLV 432 at isang puting keypad Samsung cellphone.
Nahaharap ang dalawang suspek sa kasong paglabag sa Section 5 at 11, Article II ng Republic Act 9165 o Comprehensive Dangerous Drugs Act of 2002.
Patuloy ang Batangas City PNP sa mas mahigpit na pagpapaigting sa kampanya laban sa ilegal na droga at krimen para sa ligtas, mapayapa at maayos na probinsya.
Source: Police Provincial Office 4A
Panulat ni Police Staff Sergeant Donabel Dulin
