Nasabat ang tinatayang Php3,400,000 halaga ng shabu at arestado ang isang suspek sa isinagawang buy-bust operation sa Barangay Kabuntalan, Sultan Kudarat, Maguindanao del Norte noong Disyembre 25, 2024.
Kinilala ni Police Lieutenant Colonel Esmael A. Madin, Hepe ng Sultan Kudarat Municipal Police Station, ang suspek na si alyas “Dats,” 30 anyos, residente ng Barangay Tugal, Talitay, Maguindanao del Norte.
Ayon kay PLtCol Madin, naging matagumpay ang operasyon at naaresto si alyas “Dats” at nakumpiska mula sa kanya ang 10 jumbo-sized heat-sealed transparent plastic sachet na naglalaman ng hinihinalang shabu, na may halagang Php3,400,000; isang Suzuki Raider motorcycle; limang pirasong Identification Cards (ID); isang keypad cellphone; at boodle money na ginamit sa transaksyon.
Kasong paglabag sa Republic Act 9165 o ang “Comprehensive Dangerous Drugs Act of 2002” ang kakaharapin ng suspek.
Nagpahayag naman si PLtCol Madin ng pasasalamat sa kanilang mga katuwang sa pagpapatupad ng batas at nanawagan sa publiko na ipagpatuloy ang pagsuporta sa mga programa kontra ilegal na droga.
Panulat ni Pat Ma. Señora Agbuya
