Lanao del Sur – Nakumpiska ang tinatayang Php3,400,000 halaga ng shabu habang arestado ang dalawang lalaki sa isinagawang buy-bust operation ng mga awtoridad sa Brgy. Poblacion, Marawi City, Lanao Del Sur nito lamang Nobyembre 16, 2023.
Kinilala ni Police Colonel Robert Daculan, Provincial Director ng Lanao del Sur Police Provincial Office, ang dalawang suspek na sina alyas “Minsuary” at “Ansary”.
Naaresto ang mga suspek dahil sa pinagsanib na pwersa ng PDEA BARMM, City Drug Enforcement Unit Marawi City Police Station, Provincial Drug Enforcement Unit-Provincial Special Operation Group, 1st Provincial Mobile Force Company, 3rd SRB, 500 CEB Intel Operative, at Task Force Marawi.
Nakumpiska mula sa dalawang suspek ang 500 gramo ng pinaniniwalaang shabu na tinatayang nagkakahalaga ng Php3,400,000, isang brown na wallet, isang yunit ng cellphone, isang Honda XR motorcycle, isang Toyota Avanza, at dalawang pirasong Identification Card.
Samantala, ang mga miyembro ng PRO BAR katuwang ang ibang ahensya ng pamahalaan ay hindi titigil na sugpuin ang ilegal na droga at iba pang uri ng kriminalidad para makamit ang maunlad at mapayapang Rehiyong Bangsamoro.
Panulat Ni Patrolman Vincent Valencia
