Daet, Camarines Norte – Tinatayang Php3,400,000 halaga ng shabu ang nakumpiska sa dalawang suspek sa buy-bust operation ng Bicol PNP at PDEA RO5 sa Purok 1, Barangay Magang, Daet, Camarines Norte nito lamang Miyerkules, Setyembre 14, 2022.
Kinilala ni PLtCol Arnel D De Jesus, Chief of Police ng Daet Municipal Police Station, ang mga suspek na sina alyas “Pearl”, 37, residente ng Quezon City at si alyas “Ver”, 36, magsasaka at residente ng Purok 2, Barangay Plaridel, Basud, Camarines Norte.
Ayon kay PLtCol De Jesus, naaresto ang mga suspek bandang 12:55 ng madaling araw ng pinagsanib puwersa ng Camarines Norte Provincial Intelligence Unit, Daet Municipal Police Station, Camarines Norte 1st at 2nd Provincial Mobile Force Company, PNP- Drug Enforcement Group, Special Operation Unit 5, Regional Drug Enforcement Unit 5 at ng PDEA-Camarines Norte.
Ayon pa kay PLtCol De Jesus, nakumpiska mula sa mga suspek dalawang piraso na pakete ng hinihinalang shabu na may tinatayang timbang na 500 gramo na nagkakahalaga ng Php3,400,000.
Mahaharap ang mga suspek sa kasong paglabag sa RA 9165 o ang Comprehensive Dangerous Drugs Act of 2002.
Ang matagumpay na operasyon ay patunay lamang na ang Police Regional Office 5 ay hindi titigil sa pagsugpo sa paglaganap ng ipinagbabawal na droga at upang mapigil ang anumang uri ng kriminalidad na posibleng maidulot ng paggamit nito.
Source: Camarines Norte Police Provincial Office
Panulat ni Pat Rodel Grecia
