Tinatayang Php3.4M halaga ng hinihinalang shabu ang nasabat sa buy-bust operation na isinagawa ng pinagsanib na puwersa ng Philippine Drug Enforcement Agency (PDEA) – Davao Oriental Provincial Office at Mati City Police Station dakong 9:25 ng gabi nito lamang Hunyo 3, 2025 sa Barangay Central, Lungsod ng Mati, Davao Oriental.
Kinilala ni Police Major Al Anthony I. Gumban, Officer-In-Charge ng Mati City Police Station, ang suspek na si alyas “Jay”, 46 anyos, may asawa, at residente ng Village 2, Libertad, Butuan City at itinuturing na isang High Value Individual (HVI).
Ayon kay PMaj Gumban, nakuha mula sa suspek ang limang sachet ng hinihinalang shabu na may kabuuang timbang na humigit-kumulang 500 gramo, bukod pa sa tatlong gramo na siyang subject ng buy-bust, marked money, mga cellphone, ID, at iba pang personal na gamit.
Kasong paglabag sa Republic Act 9165 o ang “Comprehensive Dangerous Drugs Act of 2002” ang kakaharapin ng suspek.
Ang matagumpay na operasyon na ito ay patunay ng mas pinatibay na ugnayan ng mga ahensya ng gobyerno upang sugpuin ang krimen at mapanatili ang kapayapaan at kaayusan sa rehiyon.
Panulat ni Pat Shairra Rose A Aquino
