Cebu City – Nasabat ng mga operatiba ng Cebu City PNP ang nasa mahigit Php3 milyong halaga ng shabu mula sa umano’y tulak ng ilegal na droga sa isinagawang buy-bust operation sa Sitio Lahing-Lahing, Brgy. Mabolo, Cebu City nito lamang Sabado, Marso 18, 2023.
Kinilala ni Police Colonel Ireneo Dalogdog, City Director ng Cebu City Police Office, ang suspek na si alyas “Pangit”, residente ng Chinese Cemetery, Brgy., Carreta, Cebu City.
Ayon kay PCol Dalogdog, bandang 9:50 ng gabi ng ikasa ng mga operatiba ng City Drug Enforcement Unit, CCPO sa pangunguna ni Police Lieutenant Colonel Dindo Juanito Alaras ang operasyon na humantong sa pagkakaaresto ng suspek at pagkakasamsam ng nasa 470 gramo ng hinihinalang shabu na may tinatayang halaga na Php3,196,000.
Nakuha rin mula sa suspek ang isang sling bag na ginamit bilang lagayan ng mga ilegal na droga at buy-bust money.
Nahaharap ang suspek sa kasong paglabag sa RA 9165 o ang Comprehensive Dangerous Drugs Act of 2002.
Patuloy naman na pinagbubuti ng buong hanay ng Cebu City PNP ang pagpapaigting sa kampanya kontra ilegal na droga para matiyak ang kaayusan, kaligtasan, at kapayapaan ng komunidad.
