Davao City – Tinatayang Php2,160,000 halaga ng hinihinalang shabu ang nasabat sa isang lalaki sa isinagawang buy-bust operation ng mga tauhan ng PNP sa Bangkal, Brgy. Talomo, Davao City, nito lamang Miyerkules, Mayo 4, 2022.
Kinilala ni PMaj Rosario Aguilar, Acting Station Commander ng Ecoland Police Station 15 ang suspek na si Juner De Asis Biajedor alyas “Jack”, 31, residente ng Purok 4, Pag-asa, Bangkerohan, Brgy. 5-A, Davao City.
Ayon kay PMaj Aguilar si alyas “Jack” ay tinaguriang Top 4 drug personality ng regional level.
Ayon pa kay PMaj Aguilar, naaresto ang suspek ng pinagsamang tauhan ng Ecoland PS15 at Regional Special Operation Group-Regional Provincial Drug Enforcement Unit 11 (RSOG-RPDEU) matapos mahuli sa akto ng pagbebenta ng ilegal na droga sa nagpanggap na poseur-buyer.
Dagdag pa ni PMaj Aguilar, nakuha mula sa suspek ang dalawang malalaking pakete ng hinihinalang shabu na may bigat na humigit kumulang 135 gramo at tinatayang may street market value na Php2,160,000 at marked money na ginamit sa operasyon.
Ang suspek ay nasa kustodiya na ng nasabing istasyon upang sampahan ng kasong paglabag sa Section 5 at Section 11 ng Republic Act 9165 o Comprehensive Dangerous Drugs Act of 2002.
Ang pagkakadakip sa suspek ay resulta ng patuloy na kampanya ng PNP laban sa ilegal na droga at dahil na rin sa tulong ng mga mamamayan upang makamit ang adhikain na gawing drug free ang Rehiyon Onse sa pamumuno ni PBGen Benjamin Silo Jr., Regional Director ng Police Regional Office 11.
###
Panulat ni Patrolman Alfred Vergara
