Lanao del Sur – Nakumpiska ang Php2,040,000 halaga ng shabu at napatay naman ang isang suspek sa engkwentro sa isinagawang operasyon ng PNP sa Brgy. Mipaga, Saguiaran, Lanao del Sur noong Oktubre 13, 2022.
Kinilala ni PBGen John Gano Guyguyon, Regional Director ng PRO BAR, ang napatay na suspek na si Abuhanan Dimaporo Sultan, 24, isang High Value Individual. Samantala kinilala rin ang tatlo pang mga suspek na sina alyas “Marko”, alyas “Nadir” at alyas “Arab”.
Ayon sa ulat ay nakatanggap ng impormasyon ang Saguiran Municipal Police Station mula sa Marawi City Police Station kaya’t nagsagawa ng hot pursuit operation laban sa apat na suspek na hinihinalang drug dealer.
Nauwi sa engkwentro ang operasyon na kung saan ay isa sa mga suspek ang napatay, samantala, ang tatlo pang mga suspek ay nakatakas papunta sa kalapit na bulubunduking lugar.
Narekober mula sa lugar ang dalawang pakete ng shabu na may timbang na 300 gramo na nagkakahalaga ng Php2,040,000, isang yunit ng 45 caliber pistol at anim na basyo ng bala.
Ang nakumpiskang ebidensya ay dinala sa Provincial Forensic Unit Lanao del Sur PPO para sa laboratory examination habang ang bangkay ng suspek ay ipinadala sa pamilya para sa Muslim burial rights.
Samantala, pinapurihan ni PBGen Guyguyon ang mga operating units sa kanilang katatagan sa paglaban sa ilegal na droga para mapanatiling maayos at mapayapa ang rehiyon ng Bangsamoro.
Ang PRO BAR ay patuloy sa paglaban sa ilegal na droga para makamit ang kapayapaan at kaayusan tungo sa kaunlaran sa rehiyon ng Bangsamoro.
Panulat ni Patrolman Mark Vincent Valencia
