Davao Del Sur – Tinatayang Php255,000 halaga ng shabu ang nakumpiska sa isang High Value Individual (HVI) sa ikinasang buy-bust operation ng mga tauhan ng Digos City Police Station sa Prk 8, Tienda Aplaya, Brgy. Aplaya, Digos City, Davao del Sur nito lamang Setyembre 04, 2023.
Kinilala ni Police Lieutenant Colonel Florante Retes, Officer-In-Charge ng Digos City Police Station, ang target ng operation na si alyas “Jayson”, 27, na tinaguriang High Value Individual at nagpapalakad ng drug den sa lugar, at kasama sa mga naaresto ang tatlong indibidwal.
Naging posible ang operasyon ng mga tauhan ng City Drug Enforcement Unit at Regional Police Drug Enforment Unit katuwang ang 1st Company ng Davao del Sur Provincial Mobile Force Company.
Nakuha mula sa mga suspek ang ilang pakete ng hinihinalang shabu na may bigat na humigit kumulang na 17 gramo at may street market value na Php255,000 at marked money na ginamit sa operasyon.
Mahaharap ang mga suspek sa kasong paglabag sa Republic Act 9165 o Comprehensive Dangerous Drugs Act of 2002.
Ang pagkakadakip sa mga suspek ay malaking kabawasan sa hanay ng mga nagbebenta ng ilegal na droga sa Rehiyon Onse na nagdudulot ng kasiraan sa magandang kinabukasan ng ating kabataan kaya patuloy ang maigting na operasyon ng PNP upang mapuksa ang salot sa ating lipunan.
Panulat ni Patrolman Alfred Vergara/RPCADU11
